THUPUI HAWNGTU (Nilai & Beihrual)

THUPUI HAWNGTU
K. Lalfakawma

Mizoram Synod hnuaia kohhranhote hian Kohhran Pathian Biak Inkhawmah hian Thupui hawn leh sawihona neia  hun hman hi kan kalphung pakhat a ni mek a. Chu hun chu Nilai zan leh Beihrual Thupui kan zir zan hian kan hmang tlangpui ṭhin a.

Lectern aṭanga thupui hawngtu hi ṭawngṭai ve tur nge ṭawngṭai loh tur tihah hian thupui hawngtute an buai ve viau ṭhin a lo ni a. Hemi chungchanga kan kohhran hruaitu hmasaten min lo kalpui tawh dan hi tlem sawi kan tum ang a.

Mizoram Synod hnuaia kan Kohhran kalphung chhui nasa leh ziak loh dan tih lehkhabu hial ziaktu Rev. Z.T. Sangkhuma(L) chuan Kum 2011-a Ziak loh Dan lehkhabu a siam phek 13-naah chuan hetiang hian thupui hawn dan chungchang  a lo ziak a. "Thupui hawngtu hian tih dik loh an nei fo mai. Thupui hawng tura ruat ni si, ṭawngṭai hauh lote, Thupui hawngtuin sawi belh hlek lova a chhiar chhuah ringawtte hi a dik lo. Thupui hawngtu chu a tir lamah emaw, a tawp lamah emaw a hun hman dan chu ṭawngṭaiin a titawp thlap tur a ni," tiin a lo ziak a.

Heta ṭang hian Tun hmaa Nilai zan leh Beihrual thupui hawngtute lo tih ṭhin dan thui tak min hriattir ngei niin alang. Kan senior Minister, Presbyterian Kohhran Kalphung tuipui em em maiin khitiang tak mai a, Nilai zan thupui hawngtute ṭawngṭai tura a lo ngai nghet a nih chuan thupui hawngtute ṭawngṭai hi kan kalphung pangngai chu a ni zawk mai lo maw tih hi a ngaihtuah theih mai awm e. Kan Pastor-te pawhin min lo kalpui tawh dan kha a inang vek lo niin alang. Amaherawh chu kan Senior Minister ten hetianga ziak meuha an lo dah a nih chuan Nilai zan thupui hawngtute ṭawngṭai ngei hi kan kalphung a lo ni zawk em aw tiin a ngaihtuah theih awm e.

Pathian biak inkhawm hruaina bu thar berah hi chuan Thupui hawngtu chu a ṭawngṭai tur a ni tih a awm lova. Hetiang hian a inziak a, "Thupui hawngtu chuan kaihhruaina chhiar chhuakin, a pawimawh lai sawi zau thei se," tiin a  inziak a.

Rev. Z.T. Sangkhuma  ngaihdanah khian Kohhran Pathian Biak Inkhawma mipui hmaa ding chhuak meuhva chanvo neitu, thua rawngbawltu leh kohhran chawmtu pawimawh tak  chu ṭawngṭai ngei tura ngaihna lian tak a awm ngei niin a lang.

Hemi chungchangah hian kei pawhin kan Synod hnuaia kan Minister senior pensioner pali ka zawt a. ka zawh zinga pathumte hi chuan ṭawngṭai turah an ngai a. Pakhat chuan Inkhawm hruaina buah hian a awm lo bawk a, a duh ṭawngṭaia, a ṭul ti lem lo chu an ṭawngṭai kher lo a nih pawhin a pawi vak lem lo ang tiin min chhang bawk a. Zawt zau zel ta ila engtin nge min chhan zel ang tih erawh hriat a chakawm khawp mai.

Mizoram Presbyterian Kohhran Pathian Biak Inkhawmah hian chanvo changtuten kan hmaa ṭawngṭai an awm avanga ṭawngṭai tawh loh mai hi kan kalphung chu a ni chiah lo. Call to Worship-ah hruaitu a ṭawngṭai ngei ngei a, hruaitu a ṭawngṭai tawh avangin ṭantuin kan hruaitu a ṭawngṭai tawh avangin ka ṭawngṭai tawh lo mai ange kan ti ngai lova.

Inkhawm hruaitu phei chuan mi dang a sawm loh phei chuan thawhlawm awm zanah phei chuan thawhlawm hlan nen vawi hnih a ṭawngṭai ngei a ngai ṭhin. Hruaitu ngeiin mi dang sawm kual lova thawhlawm a hlan ngei hi kan kalphung  pangngai zawk niin a lang bawk.

Thuhriltu pawh thua Kohhran chawmtu atana serh hran a ni a, Bible chhiar bakah ṭawngṭai ngei hi kan tihdan pangngai niin a lang. Inkhawm hruaitute, ṭantuten an lo ṭawngṭaipui tawh a nih pawhin Thuhril hmaa ṭawngṭai ngei hi kan kalphung pangngai niin alang.

Kan kohhran pakhata thupui hawngtu pakhat chuan thupui a hawn dawn hian a ṭawngṭai ngai lova, "Chairman leh ṭantu an ṭawngṭai tawh thova, ka ring nghal mai ange," tiin a thupui hawn hmain a sawi ziah ṭhin a. Miin an ngai ho angreng ṭhin khawp mai.

Kohhran Pathian biak inkhawma ṭawngṭai hian  kan chanvo leh mawhphurhna kan ngaihhlut leh ngaihhlut loh dan thui tak a hriat theih niin a lang bawk.

Ṭawngṭai hi Presbyterian Kohhran hian kan ngai pawimawh khawp mai a. Tihtakzetna, Urhsunna, Puithuna a keng tel a. Kohhran pawl dang ṭhenkhat anga mi thiamte phuah sa ringa chham mai ṭhin kan ni ve lova. Rilru tak tak hmanga ṭawngṭai ṭhin kohhran kan ni a. Ṭawngṭai hi Pathian nena kan inzawmna pawimawh tak a ni a. Kan thu zirte sawtpui nana kan hman theihna turte, kan hriatthiam loh kan hriat fiah theihna tur te, thlarau lamah sawtna leh ṭhanlen nana kan hman theihna tura Pathian ṭanpuina kan dilna hun a nih avangin ṭawngṭai hi chu kan ngaipawimawh reng tur a ni ang.

Inkhawm hruaina bu lamah hi chuan thupui hawngtute an ṭawngṭai ngei tur a ni tih a awm lo ngei mai a. Chutiang bawkin Thuhriltute pawh an ṭawngṭai ngei tur a ni tih a awm chuang lova, a tlangpuiin thuhriltute chu kan ṭawngṭai zel thova. Pulpit-a din chhuah hnua ṭawngṭai ngai lo pawh an awm thova. Thupui hawngtute hi Thuhriltu tih lovah chuan Kohhran Pathian Biak Inkhawma Thua rawngbawltu pawimawh tak, thua kohhran chawmtu pawimawh tak an ni a. Hetiang taka rawngbawltu pawimawh te hi chuan kan mawhphurhna pawimawh zia leh zahawmzia kan hriatna aṭang chuan Kohhran Pathian Biak Inkhawm urhsun taka kan tih awm leh awm loh hi chu kan hrethiam mai awm e.