DUHTHLANNA

*DUHTHLANNA*
He thil (Duhthlanna) tih hi thil pawimawh tawpkhawk a ni a, pawmdan leh inzirtirdan pawh a hrang thei viau ang. Chuvang chuan fimkhur a ngaiin sawi fuh loh chuan Pathian thua inhruaikawina leh zirtirna him lo thlen theih a nih avangin phak ang tawkin a chinchuak a sawi kan tum ang nga, a fiah zo kher lo thei bawk. Mahse kan ngaihtuahna Pathianthu lama min vensaktu nise.

*DUHTHLANNA*

Mihring duhthlanna awm reng țhin hi tu tan mah hnial rual a ni lovang. A tha zawk hre renga ti thei leh ti duh chuang si lo, inchhîrna tur mang mang pawh tihreh lo leh țhin mihring kan ni. A chhia leh a țha thlang tura rilru insual leh sual lama rilru âwn tlat țhin sawifiahna tur leh Pathian hnathawh avanga harsa chung chunga pawha Pathian kan thlan leh nge nge țhinna hrilhfiah tur chuan duhthlanna hi chi hnihin then ila-duhna zalên (free will) leh duhthlanna zalên (free choice)
*(i) Duhna zalên (Free will)*
Duhna zalên(free will) neitu dik tak chu Pathian a ni a. Ama thuin lei leh van siam a, Ama thu veka thil siam tinrengte din chhuaktu leh A duh huna tiboral țhin a, A duh huna awmtîr a, A duh huna la khawm leh mai țhin a ni. Pathian chuan Ama anpuiin mihring a siam a. Ama anpui mihringah chuan Ama anpui bawk mihring thlarau chu a din a. Chu mihring thlarau chu Pathianin A chenna bîka tana a buatsaih chu a ni. Mihringah Pathian a lo chen hian kan thlarauvah a chengin, kan nunna (soul) tithianghlimin a in atana hmangin a ti thianghlim țhin. Keimahnia a rawn chenna kan thlarauvah chuan Ama zia rawn dahin, rawn țawmin mihring thlarau chuan Pathian hnena mi Free will a chang țhin(a awmzia chu; Pathian kan hnaih theihna tur hian keimaniah hian engmah tih theih reng a awm lo tihna a nih chu.) Bawhchhiat hnu-ah chuan mihring thlarauvin zalenna pakhat mah a nei lo mai ni lovin  mitthi a ni a, amah mai chuan Pathian pawh a ring thei lo.

Mihring thlarauva duhthlanna chu Pathian Thlarau nen an inkawpa pumkhata an awm hnu-ah chauh a lo zalen thei țhin a ni. Mihring thlarau zalenna chu Pathian hnathawh ațanga lo awm thei chauh a ni tihna a nih chu. _Eden huana mihring awm laia an lo neih tawh, bawhchhiatna avanga an hloh leh tak zalenna kha duhna zalên (free will) chu a ni a._ Hetih hun laia mihring thlarau zalenna hi tuna kan neih duhthlanna kan tih nen hi chuan inhlat tak a ni a, Pathian thuneihna hnuaia zalenna hi free will kan tih tak chu a ni.

Fa ni tura duhthlang emaw, thil dang thlanna emaw a ni lo. Pathian fa, thlarau nun neiten Thlarau Thianghlim tihzalenna kan chan hnu-ah Pathian biak țul tihna mahni ngeiin kan lo nei ta a. Chu Pathian biakna chu Krista a awm Thlarau Thianghlim kal tlang anih avangin duh vang renga thlanna, duhna zalên (free will) a ni.

Pathian thu nung chu mihringah a lo awm a, kan duh anga awmna ni lo, Pathian thu nungin min neih pumhlum avanga duhthlanna thianghlim (duh duh thlang thei ni lovin) Pathian chauh thlang țhin, duhna zalên, engmah hlauh nei lo, a thlan anga pianga hlawhtling țhin duhthlanna, Pathian zia chu a ni zawk.
_Thlarau lam thilah chuan duhthlanna tihchhiatsak, chhia leh tha hre tawh lo, mitthi, bengchhet, mitdel, saruak, ring thei lo, thlang thei lo etc. a ni na-in mihringah chuan chhia leh tha hria, duhthlang thei, ngaihtuahna nei a ni thung si_

*(ii) Duhthlanna zalên (Free Choice).*
Mihring leh Thlarau hnathawh thliar hranna pakhat chu duhthlanna zalên(free choice) hi a ni. Hei hi duhna zalên (free will) nen kha chuan a inang lo tih hria ila. Thlang tura zalenna a ni ang bawkin a thlangtu chu mihring a ni. Hetiang hi Bible châng hmun tam takah hmuh theihin a awm.

 Duhthlanna zalên chu select/elect/prefer/choose(thlang) nen inanga hman a ni awm e. Duhthlanna zalên chu Setana leh Pathian hnâwlna emaw thlanna emaw ni lovin, mihring tlu chhe tawh pawhin taksaa tih tur leh tih loh tur te, Pathian thu awmsa, a zawm tur leh zawm loh tur thlanna an ni. Entirna: "uire suh" tih dan kha mihring chuan ama chhia leh țha hriatna a țanga a dik zawk a thlanna ang hi.

Pathianin vaivutin mihring a siam a, a hnara thaw a zuk thawkluh chiah khan hlum, milim chuan nunna (soul) a rawn nei ta a. Chu minung (soul) chuan duhthlanna zalên (free choice) a nei a. Duhthlang tura a mawhphurhna pawh Pathianin a hrilh nghal a. Huana thing rah tinrengte chu an duh duh an ei thei tih a hrilh bawk a. Leia thil awm mita hmuh, a ri hriat theih (matter of things) duhthlanna zalên hmangin a duh a thlangin thutawp siamin aw leh aih ti turin mihringin mawhphurhna a nei a. Adama'n rannung dangte aia Evi a thlan zawkna hi a duhthlanna zalên chu a ni.

He duhthlanna zalên hi taksaah an tih tur leh tih loh turte thlanna chu a ni a. Bawhchhiat hnuah pawh mihringten kan la nei zel a ni.
Mahni ngaiha țha kan tih zâwng apiang thlanna a ni bawk. Entirnan: Inkhawm țha ti chu kan inkhawm a; zu in țha titu chuan zu a in mai.

Pianthar hma chuan Pathian dona lam a thlang tam zawk a, pianthar hnuah erawh chuan a taksa chu Pathian tana hlanin ama duhna ngeiin martarna chenin a thlang thei. Pathian hmingin hrehawm tinreng a tuar a, thil bawlhhlawh lakah a taksa a thiarfihlim țhin.

He duhthlanna hi Pathian Thlarau awm lohna hmunah chuan a zalên ve em em a ni. A changin țhat a thlang a, a changin sualte pawh a thlang bawk. Țhat a thlan avangin a sual a tireh thei chuang lova. Sual a thlana a tihsual lai pawhin țhat a duhna a reh hlen chuang bawk lo. Pathian duhzâwnga zalenna a ni ve lova; Chu tisa _duhthlanna chu Bible-in chhe lai let der_ a tih tak kha a ni.