PRESBYTERIAAN THEOLOGY & WORSHIP KALPUI DAN TLANGPUI

PRESBYTERIAAN THEOLOGY & WORSHIP KALPUI DAN TLANGPUI
- Rev. Dr. H. Vanlalauva

Tun tum Didakhe Issue-a Presbyterian theology & worship kalphung tlangpui kan thlir ho tur hi Calvin-a Pathian thu kalpui dan leh Westminster Confession & Directory behchhana ziak a ni a. PCI dinhmun atanga thlirna pawh a ni thui hle bawk a. Presbyterian Pathian thu kalpui dan tlangpui kan thlir ho hmasa ang a, chumi hnuah Presbyterian Pathian biak dank an thlir zui nghal dawn a ni.

1. Presbyterian Theology:
Khawvel hmun hrang hranga Presbyterian Kohhran hote hian Calvin-a theology bakah Westminster thurin (Confession of Faith) hi thurin lamah innghahna leh inkaihhruaina atan kan hmang deuh bera. Chubakah Scot Confession te, Belgic Confession te, Second Helvestic Confession te, Heidelberg Catechism leh Dort Confession te pawh ngaih pawimawh a ni. India ram Presbyterian Kohhran (PCI) phei hi chuan Welsh Thurin hi innghahna atan kan hmang nasa hle bawk a ni.
Westminster leh Thurin chi hrang hrang kan sawilan takte khi a siamtu, a buatsaihtute hi John Calvin-a zirtirna ngaisangtu leh zuitute an ni deuh vek a. Calvin-a hi Kohhran siamthatna hmahruaitu zingah pawh theologian ropui bera ngaih a ni a, a lehkhabu Institutes of the Christian Religion phei chu Protestant thurin a chin chhuaka ziah chhuahna hmasa ber a ni. Calvin-a hi Luther-a ang bawka Bible thuneihna chawisangtu, rinna leh thiltih tehna dik lo thei loa pawmtu a ni a. Hei vang hian Calvin-a theology hi Biblical theology, Bible-a Pathian thu hrilhfiahna tiin an sawi nghe nghe thin a ni. Chutichuan, Presbyterian theology kan thlirho tur hi Calvin-a leh a zuituten Bible-a Pathian thu an hrilhfiah dan emaw, an kalpui dan emaw a ni deuh ber tih hi kan chhinchhiah a pawimawh ang. A hnuaia thupui hrang hrang kan then sawm zuiin lo luhchilh dawn ila.

a. Bible thuneihna (Authority of the Bible) :
Kan Kohhran thurin Number pakhatnaah ‘Thuthlung Hlui leh Thuthlung Thar Bute hi Pathian Thu a ni a, heng chauh hi rinna leh thiltih tehna diklo thei lo a ni’ tih a ni a1. He thu hi Bible thuneihna chawisanna leh tundin lehna thu puanchhuahna a ni. Bible thuneihna hi Kohhran siamthat hunlaia an buaipui berte zinga mi a ni a. Luthera leh Calvina te au hla ber pakhat a ni. Kohhran siamthat hun hma fe atang tawhin Bible thuneihna aiin Kohhran thuneihna hi dah chungnun zawk a ni a. Kohhran chu Lal Isuan Petera hnena vanram chabi a pek kawltu a nih avangin Bible-a Pathian thu hrilhfiah thei awm chhuna ngaih a ni a. Chubakah, Thuthlung Thar bute hi Bible-a telh tura Kohhranin a lakkhawm leh a pawm takte an ni bawk a. Hei vang hian Kohhran hi Bible aia awm hmasa zawk leh rinna kawngah pawh Bible aia thuneitu zawkah an lo ngai thin a ni.

Hetiang tak maia Bible aia Kohhran thuneihna chawisan hi Pathian thu kalh nia ngaiin, Kohhran siamthat hun lai khan nasa takin an dodal a. Tuna kan Bible-a bu 66 te chauh hi Pathian thawkkhuma pek nia pawmin, heng chauh hi ‘rinna leh thiltih tehna dik lo thei lo a ni e’ tih a ni ta a. Kohhran siamthat hunlai hian Bible aia chhungril lama thlarau aw hria, Thlarau Thianghlim pe pawp thei, a hnen atanga Pathian thu thar hlam dawng theia inchhal an lo chhuaka. Chung mite chuan Kohhran thuneihna leh Bible thuneihna te mausamin, chhungril lam atanga an thu hriat leh dawn te chu innghahna berah an rawn hmang ve a.2 Hei hian Kohhran siamthatna hna pawh a tithuanawp thui hle. Chung mite zirtirna lakah chuan Bible thuneihna hi chawisan a ni tel bawk.

Kohhran siamthat hunlaia Bible thuneihna an lo zirtir dan chu Presbyterian hote leh Protestant pawl hrang hrang ten kan chhawm zui ta zel a. Khawvel puma Presbyterian Kohhranin innghahna atana kan hman Westminster Thurin Number pakhatnaah Bible-a Pathian thu hi rinna leh nun dan kawng tinrengah tehna sang bera puanchhuah a ni a.3  Welsh Thurin leh Presbyterian Kohhran hrang hrang thurinah pawh puanchhuah a ni bawk a. Hetiang taka Bible thuneihna pawmtu Kohhrante chuan Trinity thurin leh Pathian chungnunzia leh lalzia thurin te hi hrilhfiah leh sawifiah harsa deuh pawh nise, Bible zirtirna a nih miau si avangin kan pawm lo thei lo a ni.

Bible thuneihna chawisan kawngah kan hriat tur pawimawh chu ‘Pathian thawkkhum’ tih thu hi a ni. Engti ang taka thawkkhum nge a nih tih thuah vawiin thlengin Reformed leh Presbyterian Pathian thu thiamte ngaihdan a rual tlang vek lo. Thenkhatin Thlarau Thianghlim sawi (dictate) anga ziak nia an sawi laiin, thenkhat ve thung chuan Thlarau pawlna leh uapna hnuaiah Pathian thu an dawn te chu ngaihtuahna fim hmanga ziak chhuah niin an ngai. He sawifiah dan chi hnihah hian mihring chaklohna a inzep tel thei ve ve. Chubakah ‘van tawng’ ni lo, mihring tawng (culture) famkim lo tak hmanga Bible-a Pathian thute hi ziak anih avangin ‘dik lo pakhat mah awm lo’ (inerrant) anga ngaih tur a ni lo. A tira Hebrai leh Grik tawnga an ziakte dik vek pawh nise, an copy chhawn zelnaah tihsual palh, belh emaw paih emaw hmuh tur tam tak a awm. Amaherawhchu, heng avangte hian Bible-a Pathian thu hlutna leh a thuneihna hi a nep chuang lo tih kan hriat a pawimawh awm e.

Thuthlung Hlui bu 39 leh Thuthlung Thar bu 27 –a thuziakte hi an hlut dan thuhmun vek niin Presbyterian Kohhran thurin leh inzirtirna chuan a pawm tih hi chhinchiah bawk ila. Calvin-a chuan Thuthlung Hlui lehkhabu a ni emaw, Thuthlung Thar lehkhabu a ni emaw an zavaiin Pathian thu an ni vek a, Lal Isua Krista leh Chanchin Tha min hriattira, min kawhhmuhtu an ni vek a ni, a ti.4  Chutianga Pathian thu tak, Isua Krista leh Chanchin Tha kengtu leh kawhhmuhtu an nih avangin an hlut dan a thuhmun veka, ngaihnep tur emw ngaihhlut tur bik awm lovin a ngai. Pathian Isua Kristaa a awm ang bawkin, Isua Krista leh a Chanchin Tha hi Bible bu tina Pathian thu ziakah te hian awmin a sawi hial nghe nghe a. Chuvangin, Bible bu 66 te hi an hlut dan leh pawimawh dan thuhmun veka ngaih a ni. Calvin-a ngaihdan hi Presbyterian hoten vawiin thlengin kan la chhawm zel a ni.

b. Pathian lalzia leh chungnunzia (Sovereignty of God):
Pathian lalzia leh chungnunzia hi Presbyterian hoten kan zirtir uar deuh bika sawi a ni a. He zirtirna hi Kohhran pawl dangte laka kan danglamna langsar tak pakhat a ni. Bible zirtirna zuiin Pathian hi mi nung pathum, Pa leh Fapa leh Thlarau Thianghlim a ni tih hi Presbyterian hoten nghet takin kan pawm a. Calvin-a zirtirna zuiin Pathian famkim ni vek, mi nung hrang ni mahse Pathian pakhat, chatuan mi, danglam ngai lo, ropuina leh thiltihtheihnaa intluk an ni tih kan pawm a. Bible-a Pathian tih hi Pa chauh ni lovin, Pa leh Fapa leh Thlarau Thianghlim sawina a ni a. Pathian nihna – engkimtithei, engkim hria, khawikipa awm, danglam ngai lo tih thute hi Pathian pakhata mi nung pathumte nihnaah kan pawma. Chutiang bawkin, felna, dikna, thianghlimna, hmangaihna, khawngaihna, thatnaa khat an ni vek bawk ani.

Pathian lalzia leh chungnunzia hi Bible zirtirna a ni a. Calvin-a zirtirna zuiin ‘doctrine of providence’ leh ‘doctrine of predestination’ thurin hmangin puanchhuah leh sawifiah a ni thin.5 Providence thurin (doctrine of providence) hian Pathian hi engkim siamtu mai ni lovin, a thilsiam tinrengte a te ber leh a tlawm ber chena enkawltu, vengtu leh humhimtu a nih thu sawina a ni a. Chutih rual chuan engkim chunga roreltu, thuneitu a nih thu a keng tel bawk a ni. Pathian rorelna, a thuneihna leh a enkawlna huang chhungah engkim hi Pathian thu angin a thleng veka ngaih a ni a. Hnahthel ro tak ngial pawh Pathian thua tla a ni a, thli tleh leh ruah sur pawh Pathian thu ang zela tleh leh tla thina ngaih a ni.6  Pathian rorelna leh enkawlna hnuaiah thil engmah hi a palha thleng awm thei lova. Accident a awm thiang lo va, Saptawnga chance emaw fortune emaw hian Pathian lalna leh a enkawlna hnuaiah hmun a chang lo. Engkim hi Pathian thu anga a ropuina tura lo awm leh lo thleng vek a nih avangin Presbyterian chuan vanduaina/ chhiatna rapthlak lo thleng thin pawh hi Pathian remruat leh Pathian thu ni vek niin kan ngaia, kan pawm thin a ni.

Pathian lalzia leh chungnunzia predestination, ruatlawk thurinin a puanchhuah ve dan pawh: mi thenkhat chhandam tura Pathianin a thlan leh a ruatlawk (predestined) laiin, thenkhat ve thung chu chatuan thihna tuar tura ruatlawk an ni, tiin.7  Pathian chhandamna thu leh ruatlawk thurin hi inkawp tlata sawi a ni a. Lal Isua Krista chhandamna hnathawh leh chumi azara chhandam pawh thlan leh ruatlawkte chauh tan a nih thu Paula theology hian zirtira ngaih a ni a. Paula zirtirna hi behchhanin Augustine-an ruatlawk thurin hi a zirtira. Calvin-a’n Augustine aia uar zawkin a ropuina tura ama duhthu ngeia Pathianin chhandam tur leh chhandam loh turte a thlangin a ruatlawk a ni, a ti. Hetianga Calvin-an ruatlawk thurin zirtirna chhan erawh hi chu, chhandamna hi mihring theihna leh thil tha tiha innghat ni lovin, Pathian khawngaihnaa innghat a nihzia zawkzia tarlan a tumna nia sawifiah a ni a. Tunlai huna Presbyterian Kohhran tam ber leh theologian tam berin hetianga sawifiahna hi an kalpui ta deuh ber a ni.

c. Lal Isua Krista leh a hnathawh (Person and Work of Christ):
Lal Isua Krista nihna leh a hnathawh chungchangah Reformed leh Presbyterian hoten hmasang Kohhran thurin, Apostol thuvawn te, Nicea thuvawn leh Chalcedonian thuvawn te hi kan zui tha hle. Lal Isua Krista Pathian mihringa lo chang a nih thu kan pawm a. Pathian tak leh mihring tak a nih thu leh Pathian nihna leh mihring nihna infin si lo, in thenhrang si loa amaha a awm kawp thu kan pawm bawk a. Calvina zirtirna zuiin mihring hmasate suala an tluka, Pathian felna dan an bawhchhiat tak thu te, chumi avanga an aiawha thuawihna famkim nen Pathian ropuina leh zahawmna a tundin thu te, Pathianin diknain a phut hlen chhuak tura Pathian Fapa hi mihringa lo chang a nih thu te kan pawmin kan zirtir bawk a ni. Tlukna hi awm lo sela, Pathian mihringa lo chan hi tul lo tura ngaih a ni a. Lal Isua Krista kha mihringa a lo chan khan sualna a nei lo. A sual lo theihna chhan chu nula thianghlim, Marin a pai vang ni ber lovin, Thlarau Thianghlimin a tih thianghlim vanga sual neilo nia ngaih a ni.8
Lal Isua Krista hnathawh hi Calvin-an zawlnei, puithiam leh lal hna angin a sawifiah a.9 Reformed leh Presbyterian hovin he zirtirna hi zuiin Isua Krista hi zawlneite anga mihringte hnena Pathian duhzawng puangchhuaktu, puithiamte anga mihringte sual thawina atana ama nunna hlantu, lal anga mihring chunga Pathian rorelna leh thuneihna thlentirtu a ni a. Lal Isua inngaihtlawmna leh midangte hmangaiha thi khawp hiala a inpekna hi Pathian ropuina lan chhuahna, mihring hmasate laka a danglamna langsar tak a ni a. Pathian ang nih ve duh avanga mihring hmasate Pathian thupek bawhchhiaa, suala an tluk laiin, Lal Isuan Kraws thihna tuarin Pathian thupek a zawm famkim a. Pathian diknain mihring laka a phut chu hlen chhuakin, Pathian ropuina leh zahawmna a tungding bawk a. Chumi azarah chuan mihring tan chhandamna kawng a lo inhawng ta a ni. Hei hi Presbyterian hovin Bible zirtirna enga Lal Isua Krista hnathawh substitutionary theory emaw penalty theory emaw satisfaction theory an tih hmanga kan kalpui dan a ni.

d. Thlarau Thianghlim leh a Hnathawh (Person and Work of Holy Spirit):
Reformed leh Presbyterian hoten hmasang Kohhran Thurinten an puanchhuah angin Thlarau Thianghlim hi Pa leh Fapa ata lo chhuak a ni tih kan pawm a. Hei hian Thlarau Thianghlim hi Pathian anihzia a nemnghet a. Pathian Fapa Isua Kristaa Pathian inpuanna leh Thlarau Thianghlim hnathawh hi a inkalh lo tih a nemnghet nghal bawk a ni.
Thlarau Thianghlim hi Pathian mihringa a lo channaah a bul tumtu a ni a. Sual laka venghima, tithianghlimtu a ni a. Baptisma a chan atanga a thawhleh thlengin Lal Isua Krista awmpuitu leh tanpuitu a ni a, thihna ata kaithotu Pathian chakna leh thiltihtheihna a ni. Thlarau Thianghlim hi zawlneitea thusawitu, ‘Lalpain a ti’ an tih theihna chhan a ni a. Bible thawkkhumtu, Bible-a Pathian thu ziaktute awmpuia tichaktu leh Bible-a Pathian thute pawh dictate-tu ang hiala sawi a ni.10 Chu bakah Bible-a Pathian thu chhiartu leh ngaithlatute tiengtu leh tanpuitu a ni. Hetiang taka Thlarau Thianghlim hnathawh hi Bible thuneihna innghahna a ni a. Kohhran thuneihna aia Bible an dah chungnung zawkna chhan pawimawh tak a ni.

Thlarau Thianghlim hi ringtute hnena Lal Isua Krista chhandamna hnathawh ataka seng luttu a ni. Kan Thurin Number 6-naa kan hmuh angin mihringte chhandamna changtua siamtu a ni a. Thlarau Thianghlim puihna tel lovin tuman misual an ni tih an hre thei lova, Lal Isua Krista Lalpa leh chhandamtu a ni tih pawh an hre thei lova, an pawm thei bawk hek lo. Rinna te, simna te, piantharna te, thiamchantirna te leh tihthianghlimna kan chante hi Thlarau Thianghlim hnathawh avang chauh a ni. Harhnain min chenchilh lai chauh ni lovin, Kohhran nunhona leh rawngbawlna zawng zawng pawh hi Thlarau Thianghlim awmpuina leh kaihruaina vek a ni.

e. Mihring leh chhandamna thu (Doctrine of Man and Salvation):
Mihring hi Pathian anpuia siam a ni tih hi Bible zirtirna a ni a. Reformed leh Presbyterian hoten mihring chungchang kan inzirtirna kaihruaitu leh innghahna pawimawh tak a ni. Kohhran Pate hunlai atangin Pathian anna tih thu hi Gen 1:26 thu tan chhanin keimahni ang (image of God) tih leh kan anpui (likeness of God) tih thu te hi awmze hrang neia hriilhfiah a ni a. Nimahsela, Calvin-a chuan Kohhran siamthat hunlai khan heng thu pahnihte hi awmze thuhmun neia ngaiin, felna bulpui – thianghlimna, felna leh hriatna dikte bakah chhia leh tha hriatna, duhthlan theihna, finna leh thatna te kawkin a lo zirtir a. Presbyterian hovin a zirtirna zuiin, tlukna avangin mihring khan felna bulpuite a hloh va, chhia leh tha hriatna te, duhthlan theihna, finna leh thatna te erawh chu sualin ti khawlo mahse, mihringin kan loh vek lo tiin kan zirtir a ni. Thlarau Thianghlim puihna tello chuan engti kawng mahin Pathian lam mi tumahin kan hawi thei lova, Pathian siam chhan angin kan nung thei tawh loa ngaih a ni.

Tluk hmain mihring dinhmun chu Pathian nena lengdun thei khawpa thaa ngaih a ni. Suala tlu lo sela, chatuan nun nei kumkhua tura ngaih a ni.11 Thilsiam zawng zawngte vengtu leh enkawltu tura ruat, Pathian aia hnuai deuh chauha siam a ni a. Vantirhkohte ai pawha chungnung zawka ngaih theih hial khawp dinhmunah a ding a ni. Mihring nihna hi taksa leh thlarau inkawp a ni a, a pahnihin Pathian siam ve ve a ni. Taksa pawh Pathian kutchhuak a ni a, thlarau pawh Pathian them ni lovin, chatuan daih tura boral thei lo tura siam a ni.
Mihring Pathian anpuia siam chuan ama duhthu ngeiin Pathian dan a bawhchhiaa, sualna leh khawlohnaah a lo intal lut ta. Hei hi mihring tlukna chungchanga Calvina zirtirna a ni a, Westminster thurin leh Presbyterian thurin dangte pawhin a puanchhuah dan a ni.12 A hma lama kan sawi tawh angin Pathian anpuia siam mihringin a tluk thleng khan hriatna dik, felna leh thianghlimna neiin, chhia leh tha hriatna, duhthlan theihna zalen leh finna te pawh a nei a. Chuvangin suala tlu lo thei dinhmunah a ding. Mahse, ama duh thu ngeia Pathian dan bawhchhiain sualah a lo tlu ta a ni. Hei vang hian a tluk veleh atangin inthiamlohnain a khat ta a ni. Paula sawi angin mi pakhat thuawih loh avangin sual khawvelah a lo lut a, mi zawng zawng misual chhandam ngai kan lo ni ta.

Mihring ama duhthu ngeia suala a tluk ni hi khawvela sual lo awm tanna, mihring chapona, mahni hmasialna leh duhamnaa a lo khah tanna ni a ni. Chu sualna chu thuawihlohna nena inkawp tlat, Pathian dan bawhchhiatna, a ropuina leh zahawmna hliamtu leh tibawrhbangtu a ni. Pathian diknain a phut hlen chhuak thei leh Pathian ropuina leh zahawmna tungding thei mihring zingah an awm loh avangin Pathian mihringah a chan a ngai a, a lo chang ta ngei a. Ama zarah chauh chhandamin kan lo awm ta a. A hma lama kan sawi tawh angin, Krista zara chhandamna chu Thlarau Thianghlimin keimahniah min sengluh sakin, thiamchantirna te, piantharna te, tihthianghlimna te kan lo chang thei ta a ni. Hetianga Thlarau Thianghlim hnathawh lo lan chhuahna tur hian Chanchin Tha hril a ngai a, Thlarau Thianghlim puihna avanga ringtute chu Kohhran inpawlhona tel leh Kohhran huangchhung rawngbawlnaa tel hi tihmakmawha ngaih a ni.
Lal Isua Krista zara chhandamna ringtuten an chan thu hi a hmalama kan sawilan tawh angin Westminster thurin leh Prebyterian thurin thenkhatah Ruatlawk thu nen sawi zawm a ni.13 isua Krista zara chhandamna hi Pathianin a koh leh a ruatte hnenah Thlarau Thianghlimin a sengluh sak thin. PCI thurina kan hmuh ang hian an sualzia a hriattir a, Krista hriatna lamah an rilru a tivar a, a duhnate titharin, Lal isua Krista Lalpa leh Chhandamtua pawm tura thlemin, pawm thei leh ring thei turin a pui a.14 Chutianga Thlarau Thianghlim hnathawh avangin piantharna te, thiamchantirna te leh tihthianghlimna te chu kan lo chang thei ta thin a ni. Thlarau Thianghlimin mihringte chhandamna chang tura a thawh dan hi ruatlawk thu nena sawi zawm anih avangin zawhna chi hrang hrang a kaichhuak a. Chhandamna hi Pathian khawngaihnaa innghat a nihzia a tarlan rualin, Pathian khawngaihna han a huam zim lu deuh em tih te, thenkhat tan Pathian khawngaihna hi hnar theihloh a ni tihna a ni em tih te, chhandamna thahnemngaihna avangin khawpui fai leh thianghlim bera sawi a ni a. Chubakah vawiin thlengin Reformed leh Presbyterian Kohhran huhang nasatna ramte hi ram chang kang leh hmasawn ber berte an lo ni ta bawk a ni. Thilsiamte chhandamna thu zirtir kawngah Reformed leh Presbyterian theologian-te hi khawvel huap han thlir pawhin hmahruaitu an ni mek bawk.

f. Kohhran leh a rawngbawl hna (Church and Ministry):
Kan Kohhran Thurinin a puanchhuah ang hian Lal Isua Krista ringtu zawng zawngte hi mal tlat lova Kohhrana tel vek turin Reformed leh Presbyterian hote chuan an zirtir a. Pathian chenna, ringtuten a huhova Pathian kan pawlna leh a rawng kan bawl hona a ni a, Pathian malsawmna a huhova kan channa hmun a ni. Kohhran Pate zinga mi, Cypriana chuan Kohhran pawnah chhandamna a awm lo, tiin a zirtir a. He zirtirna hi Bible zirtirna dik tak nia ngaiin, Calvin-an a pawm nghet hle. Kohhran hi ringtute nu (mother of all believers) tiin a vuah hial a.15 Mihring tung chhova kal zawng zawngte hi Lal Isua Krista chenin nu tel lova kan piang thei lo ang bawkin Kohhran tel lovin mi tumah ringtu a nih theih lo va, chhandam a nih theih loh, a ti a ni.
Kohhran hi Krista taksa, a thisena lei a nih tih pawm tlat chungin, Kohhran hi Thuthlung Hlui hun atang daih tawha lo awm, Lal Isua Krista chhandamna hnathawh azara tundin leh siamthar a ni tih hi Calvin-a zirtirna a ni a.16 Chubakah, Kohhran hi hmuh theih leh hmuh theih loh a nih thu sawiin, Kohhran hmuh theih leh hmuh theih loh chu inzawm tlat, then hran theih loh niin a zirtir bawk a. Kohhran hi pakhat, thianghlim, huapzo, Tirkohte zirtirnaa innghat a ni tih a pawm a. Pathian thu hril leh zirtir te, sacrament – Baptisma leh Lalpa zanriah leh Kohhran thianghlimna atana inthununa kenkawh te hi Kohhran dik lanchhuahna niin a zirtir bawk a. Kohhran chungchanga Calvin-a zirtirna te khi Presbyterian Kohhran hian a pawm deuh vek a ni.
Luthera leh Calvin-a zirtirna zuia ringtu zawng zawng puithiam nihna (priesthood of all believers) hi Presbyterian hote hian kan pawm rualin, Pathian thu hril leh sacrament rawngbawl hna khawih tur erawh hi chuan nemngheh rawngbawlna (ordained ministry) hi tih makmawha awm turah kan ngai. A telovin Kohhran rawngbawlna hi kalpui theih loha ngaih a ni. Nemngheh mite chu Kohhran kal tlanga Pathian kohna dawng tura ngaih an ni a.17 Pathian thu mite zirtir chhawng thei khawpa thiam tura beisei an ni. Nemngheh rawngbawltu Pastor/Minister te bakah Upa atana nemngheh te an awm bawk a. Pastor/Minister-te nen Kohhran inrelbawlna leh inenkawlna thawkho tur an ni. Kohhrana mi rethei leh chhumchhiate chhawmdawlna kawnga mawhphurtu atan Deacon/Deaconess hi awm tura ngaih a ni bawk. Kohhran inrelbawl hna hi tualchhung Kohhran Committee atanga Assembly thlengin Inkhawmpui leh Committee hrang hrang hmanga kalpui tur a ni bawk a. Heng inkhawmpui leh Committee hrang hrangah hian Pastor leh Upate an thawk hova. Hun engmaw ti atang tawh khan a theih anga tam Kohhran Hmeichhe aiawh te, Thalai aiawhte pawh Inkhawmpui leh Committee hrang hrangah te hian an tel ve theihna kawng hawn sak a ni. Hetiang hi Presbyterian Kohhran inrelbawlna leh rawngbawltute dinhmun a nih avangin, tualchhung Kohhran mal chauh ngaihtuah lovin, Pastor Bial, Presbytery, Synod leh Assembly huapa rilru zau tak put a pawimawh hle a ni.

Reformed leh Presbyterian Kohhran hian Chanchin Tha hril hi a hnapui berah a ngai a. Kohhran siamthat hun lai khan Calvin-a kaihhruaina hnuaiah Geneva Kohhran Saint Pierre Church an tih chu Brazil rama missionary tir hmasa ber a ni. Kum zabi 19-na leh 20-na hunlai khan khawvel ram hrang hranga missionary tir chhuak tam ber zingah Presbyterian Kohhran engemaw zat hi an tel a. Africa leh Asia ramah te Presbyterian Kohhran nung tak leh chak tak vawiin thlengin a din phah a. India ram chhim leh hmarah pawh kan Kohhran PCI bakah Church of South India leh Church of North India te hi Presbyterian missionary-te hnathawh rah an ni.
Khawvela Pathian ram din hi Chanchin tha hrilin a ken tel a ni tih hriain, huaisen takin ram leh hnam siamthatna kawngah zawlnei hna a thawk bawk thin. Presbyterian Kohhran hian Kohhran hi Krista taksa anihzia hriain, Kohhran inpumkhatna hi a ngai pawimawh a. Presbyterian identity hlauh thak khawpin Krista taksa, Kohhran inpumkhatna atan a bei thin a ni.

g. Hun hnuhnung beiseina (Doctrine of Christian Hope/Last Things) :
Hun hnuhnung beiseina thu hian Lal Isua lo kal leh beiseina te, mitthi tawhlehna thu te, rorelna hnuhnung lo thleng tur leh Pathian ram a famkima a lo thlen thute hi a ken pawimawh zualte an ni. Thihna leh vanram leh hrehmun awm rinna te pawh a keng tel bawk a . Calvin-an Lal Isua lokal leh tur thu te, mitthi thawhlehna thu te, rorelna hnuhnung la awm tur thute hi Bible zirtirna tanchhanin chipchiar deuh takin a zirtir a. Heng hun hnuhnung thute hi Bible zirtirna a nih avangin Reformed leh Presbyterian Kohhran hian a ngai pawimawh em em a ni. Westminster Thurin leh Welsh Thurinah te phei chuan chipchiar taka puanchhuah a ni. Lal Isua lokal leh hunah mitthi thawhlehna a awm ang a. Chu thawhlehna chu ni hnuhnunga rorelnain a zui ang a. Ringtute chu vanramah chatuan ropuina lawmluhin kan awm ang a, ringlote erawh chu chatuan hrehmuna paih thlakin an awm dawn tih kan ringin kan beisei a ni. Reformed leh Presbyterian ho zingah kum sang rorel tuipui thahnem tak an awm. Bible zirtirna penhleh ang deuha ngaih a nih avangin Calvin-a zirtirnaah hmun an nei lo va. Hei vang hian Westminster thurin leh Presbyterian thurin dangah kum sang rorel thu te, mi thianghlim lawr thute hian ngaih pawimawh an hlawh lo va. Kohhran nawlpui inzirtirna leh inchawmnaah pawh ngaih pawimawh a hlawh phak lo. Kum sang rorel chungchanga inzirtirnaah mitthi thawhlehna hi vawikhat aia tam awm tura inzirtir a ni a. Kum sang rorel pawh tuna Israel rama kum sangkhat chhung a hring a hrana ataka lo la awm tura beisei a ni. He zirtirna hi Bible zirtirna behchhan tur a that tawk loh avang leh a awm chhun pawh khuhhawnna thu (apocalyptic literature) ami deuh vek anih avangin ngaih pawimawh a hlawh meuh lo a ni.

Westminster leh Presbyterian thurin hrang hrangah mitthi thawhlehna hi taksa thawhlehna nia inzirtir a ni a. Apostolte thurina ‘Taksa thawhlehna ka ring’ tih thu pawh hi Grik tawngah chuan ‘Tisa thawhlehna ka ring’ tih a ni nghe nghe a. Chu chuan Lal Isua lokal leh huna mitthi thawhlehna hi taksa ngeia thawhlehna a nih tur beiseina a keng a ni. Westminster Thurin leh Welsh Thurinah taksa thawhlehna a nih beiseina thu hi puanchhuah a ni a. Reformed leh Presbyterian theologian pachal ber berte pawhin taksa thawhlehna ni turin an ngai. Khawvel finna leh thiamnain min chim karah taksa thawhlehna ring lo mipui mimir zingah an thahnem sawt hle. Lal Isua lo kal lehna leh ni hnuhnunga rorelna te pawh hi a taka lo thleng tura ngai lo an thahnem hle bawk. Hetih karah hian tunlaia Reformed theologian hmingthang tak mai, Moltmann-a leh Presbyterian theologian thenkhate chuan khawvel ram hrang hrangin nuclear ralthuam an chhek khawl tam dan atang te, thilsiam dangte chunga chhiatna (environmental crisis) lo thleng mek atangte hian ni hnuhnung - Lal Isua lokal lehna leh rorelna ni hnuhnung te hi lo thleng hnai tawh hlein an zirtir uar hle thung a ni.

2. Presbyterian Worship kalpui dan:
Reformed leh Presbyterian hoten Worship (Pathian biak) hi Pathianin mihring a siam chhan niin an ngai a. Mihring chakna leh duhna hrikthlakna emaw phuhhrukna mai ni lovin, Pathian ropuina puanchhuahna leh a hmangaihna chhan letna a ni. Westminster Thuinchhanga zawhna hmasa ber chu, Pathianin mihring a siam chhan hi engnge ni? tih zawhna hi a ni a. A chhanna chu, Pathian chawimawi leh kumkhaw tlai tluana amah nena inpawl hi a ni, tih a ni. Tawngkam danga kan sawi chuan, mihring dam chhan ber chu Pathian biak, tih hi a ni. A thil siam tlawm tak mai kan ni tih hriaa, min siamtu leh min tlantu Pathian hmaa kuna, inngaitlawm leh thuhnuai rawl tak chunga Pathian hi fak leh chawimawi tur kan a ni.

Calvin-an Pathian hriatna hi Pathian inpuanna avangin mi zawng zawngin an nei thei vek, tiin a zirtir a. Pathian inpuanna vanga Pathian hriatnain a nghawng chhuah chu Pathian biak hi a ni, a ti.18 Sakhaw hrang hrangte hian leilunga Pathian inpuanna avangin engemaw chen Pathian hriatna hi nei vea ngaih a ni a. An sakhaw biakna thilte hi chutianga Pathian hriatnain a rah chhuah ni ve bawk chu nia ngaih a ni. Chutianga sakhaw dang betute mahin Pathian biakna rilru an put chuan, Isua Kristaa Pathian inpuanna famkim leh vawrtawp dawngtu, Pathian ropuizia leh a hmangaihna thukzia hretute tan Pathian biak, amah fak leh chawimawi hi tihmakmawh a ni.

Reformed leh Presbyterian hote hian Pathian biak hi Biakinah chauh ni lovin, nitin nun leh hnathawhah te tih tura ngaiin, an inzirtir a. Saptawnga ‘Work is worship’ an tih ang deuh hian taima taka hnathawh chen hian Pathian biakna, a hnena lawmthu sawinaah an ngai nghe nghe a ni. Chutianga Pathian khawngaihna leh hmangaihna an chhan letna chu Sociologist hmingthang Max Weber-a’n Calvin- a zirtirna zuitu Reformed hote leh Presbyterian hote an changkan bikna chhan niin a ngai a ni.
Westminster Thurin an siam tuma Pathian biak Inkhawm hruaina (Directory of Public Worship) an siamah ahuhova Pathian biak hi Pathian hmangaihna chhan letna a nih thu tarlan a ni. Ringtute hi a huhova inpawl khawmnaah tel theuh tur a ni a. A huhoa Pathian biak hi Pathian chawimawina leh a hmangaihna chhan letna a nih bakah, ringtute intihsawt tawnna tha ber leh rinnna kawnga thanlenna siamtu pawimawh ber pakhata ngaih a ni bawk a.19 Taksa leh thlarau lama mamawh inphuhhruksakna atan te, unau anga kan inhmangaih tawn theihna tur te, rinna chhungkua kan inpumkhat theihna turin a pawimawh. Heti taka a huhova Pathian biak hi a pawimawh rualin, Presbyterian inkaihhruainaah ringtute hi a mal pawha Pathian be thin tur te, chhungkuaa mahni inlama Pathian biakna maicham hung thin tura zirtir kan ni.

Kohhran siamthat hunlai khan a huhova Pathian biak hi Pathianniah tum thum zing, chhun leh tlaiah an neih thin a. Hapta karah pawh mipuite khawsak dan leh remchan dan azirin an nei bawk thin a ni.
Welsh ram Kohhran hian Pathian niah inkhawm vawi thum an neih bakah, Nilai leh Inrinni tlaiah an nei a. Tuna Mizorama kan inkhawm ang deuh bawk hian inkhawm hun bi fel tak an nei thin. Calvin-a hun laiin Pathianni apiangin vawi thum urhsun takin an inkhawm ziah a, thlakhatah vawi khat tal Lalpa zanriah an kil ho thin. Tunlaiin ram changkang Scotland leh England ram angah te khuan Pathian biak inkhawm hi Pathianni zing karah Pathian biak inkhawm tum hnih tum thum an nei a, tlai lamah pawh inklhawm an nei bawk thin. Kohhran miten a remchan dan angin chungi inkhawmah chuan an tel thin. Pathianniah inkhawm tum khat emaw tal chu Pathian thu zirhona atan an hmang bawk thin. Ram leh mihring khawsak dan hian inkhawm hun leh kalhmang a hril thui hle.

Westminster thurin leh Presbyterian thurin hrang hrangin Pathian biakna hmanrua a sawi tlangpuite chu Pathian thu chhiar leh hril, a mal leh a huhova tawngtai, a huhova hla sak te hi a ni a. Calvin-a hunlai atanga Reformed leh Presbyterian Pathian Biak Inkhawm Kaihruaina (Order of Service) –ah thilpek lakkhawm leh hlan te, thupuan te hi Pathian biakna thil paiwmawh taka chhiar tel a ni bawk a. Tawngtaina chi hrang hrang, lawmthu sawi tawngtai (prayer of thanksgiving) te, sual thuphachawi tawngtai (prayer of confession) te, midang tana tawngtai (prayer of Intercession) te neih a ni thin a. Heng tawngtaina chi hrang hrangte hi inkhawm tantir lamah te, a laihawlah leh a tawp lamah te neih thin a ni. Pathian fakna hla sak hi mipuiin Pathian inkhawma chanvo an neih ve awm chhun a nih avangin hla hi inkhawm tan hnuah pathum aia tlem lo sak thin a ni. Bible chhiar leh Pathian thu hril hi hi ngaih pawimawh ber a ni a. An ngaih pawimawhzia lanna chu Biakin tam berah pulpit hi a laiah hun a ni.

A huhova Pathian biak inkhawm hi hmun tam takah inkhawm hruaina fel tak hmangin urhsun takin an kaihruai a. Kohhran siamthat hunlai atangin ‘Thu sawm pek’ hi Pathianni inkhawmah sawi rual emaw, chham rual emaw a ni deuh ziaha, Lalpa tawngtaina/Lal tawngtai/Lal biakna hi vawi khat emaw tal sawi rual thin a ni bawka, malsawmnain inkhawm hi Pastor-in a tihtawp thin a ni. Inkhawm hun chhung rei lam hi darkar khat atanga darkar hnih chhung a awh deuh ber thin. Reformed leh Presbyterian Kohhran Pathian biak inkhawm hi urhsun (solemn) taka kaihhruai a ni tlangpui a. Amaherawhchu, America ram hmun thenkhatah te leh South Africa ram hmun thenkhatah erawh lam leh taksa chetnate te hian hmun a chang tam ve hle.. Scotland ramah khuan Pathiannia inkhawm tan dawn apiangin Pastor leh Upaten Bible kengin procession kawngka pui atanga puilpit bul maicham thlengin an neia, inkhawm an tan zui nghal thin. Inkhawm ban veleh pulpit atangin kawngkapui thlengin Bible keng chung bawkin procession an nei leh ziah thin a ni.

Sacrament pahnih – Baptisma leh Lalpa Zanriah te hi Thuthlung Thar hun atangin Pathian biakna thil serh pawimawh berte an ni.20 Kohhran siamthat hun hma lama Sacrament pasarihte kha vawiin thlengin Catholic Kohhran leh Orthodox Kohhrante hian an la chhawm zui zel a. Heng zingah hian Baptisma leh Lalpa Zanriah te chauh hi Lal Isuan Kohhran thlarau lam chawmna tur leh amah kan biakna hmanrua atana a siam a ni tih Luthera leh Calvin-a te khan an pawm a. Reformed leh Presbyterian Kohhran huang chhungah Protestant Kohhran pawl dangte ang bawkin Pathian biakna thil serh pawimawh ber a ni zui zel ta a. Nemnghehte chauh lo chuan Baptisma leh Lalpa Zanriah Sacrament-te hi khawih phal a ni lo.
Baptisma hi Krista nena kan inzawmna te, Thlarau Thianghlim zara piantharna chhinchhiahna leh nemnghehna a nih rualin, Lalpa hnena kan inhlanna thiltih a ni bawk.Kohhrana inlawmluhna a nih bakah khawngaihna thuthlung an chan chhinchhiahna leh nemnghehna a ni. Miin baptisma hi a chan tawh chuan chan nawn tawh loh tur a ni. Baptisma hi Krista mi kan nihzia chhinchhiahna a ni a, vawi khat chauh chan tura ngaih a ni. Nausen baptisma (Infant baptism) hi Thuthlung Thar hunlai atanga Kohhranin a kalpui thin a nih avangin kalpui chhunzawm zel a ni a. Ringtu nu leh pa kara piang nausente chu Pathian mi an nih chhinchhiahna hi pek ve ngei ngei tura ngaih a ni. Nausen emw puitling emaw baptisma chang tawhte chu Thlarau Thianghlim zarah Pathian khawngaihna chang tura ngaih an ni bawk.

Lalpa zanriah hi Pathian khawngaihna leh thatna ringtuten an dawnna hmanraw pawimawh tak a ni. Hming hrang hrang puttir a ni a. Inpawlna thianghlim (holy communion) tih te, lawmthu sawina ruai (eucharist) tih leh Lalpa zanriah (Lord’s Supper) tihte hi Reformed leh Presbyterian Kohhranten kan hmang deuh ber. India ram Presbyterian Kohhran chuan Lalpa Zanriah hi Krista thihna hriatreng nana chhang leh uain chanho hi a ni a, ringtuten Krista thihnaa hlawkna an chan chhiahchhiahna leh nemnghehna a ni tiin a hrilhfiah a.21 Kohhran hoten Isua Krista
leh a inhlanna kan pawmzia te, kan hlawkpuizia te, a rawngbawl tura kan inpek zelna te, amah kan pawlna leh mi dang nena kan inpawlnate entir nan Lal Isua lo kal leh hma loh zawng chan ho thin tur tih a ni a. Van Kohhran, kan hmangaih kal hmasate zawng zawng nen pawha Thlarau Thianghlim awmpuina azara nung kan inpawlna ni bawka ngaih a ni. Westminster Confession-in Lalpa zanriah hi Krista thihna hriatrengna leh ringtuten a thihna avanga hlawkna kan chan chhinchhiahna leh nemnghehna a nih thu a sawi a. Chubakah a rawngbawl zel tura inpekna leh amah leh ringtu dangte nena inpawlna a nih thu puanchhuah a ni bawk. Thlarau Thianghlim puihna azara nunga Krista nena inpawlna a nih thu hi Calvin-an a ngaih pawimawh lai tak pakhat a ni a. Lalpa zanriah sacrament-ah hian rinna taka changtuten Thlarau Thianghlim tanpuina azarah Krista nena inpawlna ataka chan theih a ni.

Baptisma leh Lalpa Zanriah Sacrament Inkhawm hi Kohhran Inkhawm pawimawh leh urhsun ber anih avangin Kohhran mite tel vek tura beisei a ni. He Pathian biak inkhawm urhsun tak neih tum hian Tirhkohte thuvawn emaw Nicea thuvawn emaw dinga sak emaw sawi rual emaw a ni thin. Geneva Kohhran a enkawl lai khan Calvin- an Lalpa Zanriah hi Pathianni Inkhawm apiangin vawi khat chu kan hre thei awm e. Protestant Kohhran zingah Presbyterian Kohhran Pathian thu kalpui dan hi Bible zirtirna nen a kal dun tha hlea sawi a ni a. Bible thuneihna kan pawm dan leh sawifiahna te pawh hian belhchian a dawl hlea ngaih a ni. Trinity thurin kan pawm dan te, Isua Krista leh a hnathawh kan zirtir dan te, Thlarau Thianghlim leh a hnathawh kan zirtirna te hi Bible zirtirnaa innghat a ni a. Kohhran leh a rawngbawl hna kan zirtir dan leh kalpui dan pawh hi him tawka ngaih a ni a. Chanchin Tha hril kawngah leh Kohhran inpumkhatna lamah hmasawnna tur tam tak la nei mah ila, Pathian khawngaihna leh a awmpuina kan dawng hle a ni.
Hringtu Kohhran thurin lama Pathian lalzia leh chungnunzia a bik takin ruatlawk thurin an lo kalpuithin dan erawh hi chu vawiin thlengin dawnsawn thiam a har deuh a. PCI Thurin Sawm thlanchhuahah langsar takin puanchhuah ni lo mahse, Westminster Thurin leh Welsh Thurinah hmun pawimawh tak a luah avangin hlamchhiah theih a ni lo va. Bible zirtirna a nih avangin thlauhthlak theih a ni bawk hek lo. Pathian lalzia puanchhuahna a nih thu leh chhandamna hi Pathian khawngaihna a nihzia sawifiahna pawimawh tak a ni tih erawh kan chhinchhiah a pawimawh ang. Pathian biakna kan kalpui dan te khi Kohhran mite dinhmun leh mamawh ngaihtuah chunga kan kalpui thiam a pawimawh hle bawk a ni. Nakin hunlo awm zela tura kan kohhran kal zel dan tur ngaihtuahin naupang leh thalaite thlarau chawmna lam hi tun aia kan ngaih pawimawha, kan tihchak leh zual erawh a pawimawh hle. Presbyterian Pathian thu kalpui dan leh Pathian biak dan tlangpui kan sawi tak te khi khawvel ram danga Kohhran hote nena kan dinhmun leh mamawhte phuhru tura siam leh buatsaih a ni tih hria ila. Chu bakah kan thurin leh Pathian biak dan tam ber hi kum tam tak kal tawha mite taksa leh thlarau dinhmun ngaihtuaha siam a ni tih hre tel bawk ila. Hei vang hian khawvel ram danga rinnaa kan chhungte nena kan inpumkhatna tichhe chuang lova, kan Kohhran dinhmun leh mamawhte ngaihtuah chunga Pathian thu hi kalpui thiam kan zir erawh a tul a. Pathian biakna pawh tun aia Kohhran mite mamawh phuhru kim thei tur leh Pathian ropuina tur ngaihtuaha kan kalpui thiam a tul hle bawk ang.

A tawp berah chuan, Kohhran hoten Pathian fak leh chawimawi hi Pathian min kohna leh a duhzawng a ni tih hre thar leh zual ila. A ropuina tur leh a ram zauna tura a duhzawng kan tih theuh theih nan Pathian thu hi kalpui tum ila, Amah biakna pawh fimkhur takin I kalpui thn ang u.

Endnotes
1. India Ram Presbyterian Kohhran Dan Bu (Aizawl: SL &PB,  2016), p. 1

2.  H. Vanlalauva, Doctrine of God: John Calvin’s Doctrine of God with
Special Reference to the Indian Context(Delhi:ISPCK, 2007), p. 209.
3. Westminster Thurin,I.10 in Westminster Thurin leh Welsh Thurin.  Published by Calvin Study Centre (Aizawl: CSC, 2015) .Hereafter
cited as Westminster Thurin.

4. Institutes II.10.2
5.  George Timothy, Theology of Reformers (Nashville: Broadman
Pess, 1988), p. 308.

6. Institutes I.16.75
7. Institutes III.21.5
8.  H. Vanlalauva, Doctrine of God, p. 177.

9. Institutes III.15:1-6
10.  H. Vanlalauva, Doctrine of God, p. 208. Cf. Commentary on II  Timothy 3:16

11 Ibid., p. 173.
12Westmnster Thurin, IX:1,2
13Westminster Thurin, X:1,2
14 India Ram Presbyterian Kohhran Dan Bu, p. 3.
15 Institutes IV.14:2
16 G.S.M. Walker, “Calvin and the Church” in Readings in Calvin’s  Theology. Ed. By McKim (Grand Rapids: BakerBook House,
1984), p. 213.
17 InstitutesIV.20.2
18 Inst itutes I.3.1
19Westminster Thurin, XXVI, 1-3.
20 Westminster Thurin, XXVII, XXVIII, XXIX
21 India Ram Presbyterian Kohhran Dan Bu, p. 4.