ARMINIAN-HOTEN DUHTHLANNA AN DAH LIAN VIAU HI A DIK CHIAH EM?

ARMINIAN-HOTEN DUHTHLANNA AN DAH LIAN VIAU HI A DIK CHIAH EM?

Arminian-te zirtir țhin dan anga Duhthlanna hi chhandamna atana a pawimawh hle a nih chuan enge nghawng chhuah a neih theih tih kawng 3 chauhin i han hisâp mai mai teh ang aw:

1. Pathian Engkimhria (Omniscient) a nihna a nghawng thei em?:

Tlanna hna thawh zawh a nih hnuah chhandam kan nih dawn leh dawn loh chu mihring duhthlanna lamah a innghat tawh tih hi an zirtir dan a ni a; hei mai hi ni lovin chhandam nih tawh hnuah pawh duhthlanna hmang bawka hnâwl leh a, bo hlen leh daih theih a ni an ti bawk. Chuti a nih chuan kan thâw a tâwp țhak thlenga kan duhthlanna hmanga kan thlan tluan parh leh tluan parh loh a chian chiah hma chuan chhandam kan nih dâwn leh dâwn loh chu a la chiang lo hle tihna a ni phawt mai a. Khawvêl puma chhandam tûr zât, vanram kai tûr zât phei chu khawvel tâwp Rorelna Ni a thlen phawt hma chuan Pathian meuh tan pawh hriat ngaihna a awm lo tihna a ni (unconditional election leh perseverance of the saints an pawm si lo va). Chuti ni se, Pathian chuan engkim a hre lâwk thei bik lo tawp tihna a ni a, Pathian attribute an tihte zinga mi 'Engkimhria' a nihna hi a va dik thei ta âwm si lo ve.

2. Nunna Bu-ah hian a tlachawpa ziah keuh keuh a va ngai awm ve?:

Sakawlh chibai buk turte chu leilung piantirha talh tawh Beramno Nunna Bua hming chuang lo te an ni a. Heng Bible chang  Thup 3:5; 13:8; 17:8; Sam 69:28 etc. ațanga a lan dânin Nunna Buah hian hming ziaksa vek ni âwm takin a lang a, Mosian Israelte tana a dilsakna thuah pawh khan Mosia hming chu a hma daiha ziak lâwk diam tawh ni ngeiin a lang bawk (Ex 32:32). Duhthlanna chu thil pawimawh tak a nih laiin, inthlâk thut thut thei a nih bawk si avangin chhandamna pawh bosan leh theih a ni tih a nih si chuan, Nunna Buah hian hming chuangsa awm lovin a tlachawpa ziak zel a va ngai awm ve.

3. Isua thihna kha a thlâwn maiah a chang thut thei em?:

Duhthlanna chu Pathian leh Setana pawhin an khawih ngam lohva zalên ang hiala sawi a ni fo va, chutiang chu a lo nih tak tak chuan, probability theory ațanga chhutin, Isua tlanna chu tumahin an lo awih duh loh theihna chance 100-ah 100 a awm tihna a ni dawn a, a thlawn maia Isua a thih ngawt theihna chance hi a sâng hle! Pa leh Fapa khan tute emaw talin an lo rin hlauh tâk dahin tiin Risk an rawn la ve tak meuh meuh tihna a ni thei ang. RC Sproul-a sawi dan takin, Chhandamna hi mihring duhthlanna lamah a inghat ve a nih phawt chuan - Isua chu mi zawng zawng chhandamtu ni ve thut thei, mahse a tak taka tumah chhandam lawi si lo thei bawk (potential saviour of all but actual saviour of none) anga kan ngaih a țul mai âwm mang e.

Ka hmuh dan chuan Semi-Pelagian te leh Arminian-te hian duhthlang thei tura Chanchin Țha hre phâk chinte chauh ngaihtuahin zim takin thil an thlîr niin a lang a, Chanchin Țha hre phak lo mi tam zawk daihte chu an hmuh hmaih mai bakah mi chi tinrengte pianpui mizia hrang nuaih, kan duh reng vanga kan neih ni hlawm hlek lo, mahse kan duhthlanna thununtu ni tlat si te chu an an hmuh kân vek bawk niin a lang. Tichuan, ZIM TAKA thlir e ti lo chuan ZAU TAKIN chhandamna kawngka chu khawvel mi zawng zawng tân an hawng huau ringawt mai a ni. Mahse ngun taka ngaihtuah chuan chhandam ni thei tur hi mi tlemtê bâk an awm thei chuangin a lang lo va, an chhandamna zirtir dan hi Chance chhetêa innghat mai mai niin a lang tlat nia. Chhandamna chance-a innghat anga ngaih ngawt lah chu a biblical lo hle dawn si (Hman deuh khan CHHANDAMNA: BY CHANCE OR BY ELECTION? tih ka post tawh nghe nghe kha).

Calvinism erawh chuan hmanlai ațanga thil thlen tawh dan leh tun thlenga a thlen mek dan chenin Bible behchhanin ZAU TAKIN thil awmzia a thlir phawt a, Bible zirtirna ni ngeia a lan si avangin loh theih lohvin ZIM TAKIN chhandamna kawngka a hawng ve thung a ni - "Nunna luhna kawngka chu a zim a, chuta lut pawh tlemte an ni," tih te, "Sâwmte chu tam tak, thlante chu tlêmte," tih ziak ang khan.