SIM CHI HNIH

*SIM CHI HNIH*

*SIM* hi a pawimawh khawp mai. *RIN* nen hian thil kalkawp tlat, thliarhran/lakhran hleih theih loh a ni.
Khawngaihna avanga min chhandamna hi *'RIN'* hmanga chan anih rualin, *'RING'* tur hian *'SIM'* a ngai tlat thung!
*'SIM'* awmzia hi chihnihin sawi dawn ila.

*PAKHATNA:-*
1. *'SIM'* _(to renounce, to resign, to quit, to leave out, to give up, to retire from...)_ *Thil chin (dawklak) țhin bansan, nghei, thlah,* tihna angin Mizo tawngah hian kan hmang țhin a. Mizo țawnga kan hmanna țhinah te hian a dik lo hranpa lo va, mahse, Bible-a *SIM* kan hmuh nen hi chuan a inang chiah lo!

Eg:     1. Zu in bansan/nghei = *SIM*
2. Mei zuk bansan/nghei = *SIM*
3. Zu zawrh bansan/nghei = *SIM*
4. Țawngkam mawi lo bansan = *SIM*
5. Thatchhiat bansan/thlah = *SIM*
Khing țawngkamah te khian, *sim* tih kan hmanin, mizo țawngah chuan dik lohna a awm hranpa lo va, mahse kan Bible-in min zirtir *SIM/SIMNA* nen chuan a inang hauh si lo!!

*PAHNIHNA:-*
2. *SIM* _(repent/repentance)_ tia kan Bible-a kan hmuh tam ber erawh hi chu, a țawng bul lam ațanga en chian chuan, *metanoia* = _(to change one's mind, i.e. to repent, to change one's mind for better, heartily to amend with abhorrence of one's past sins, to think differently)_ *inchhir/pawiti/lungngai/thiltih lai mék leh tih țhin, a dik lo tih pawm a, chumi duh tawh lohna rilru thar pu,* tihna a kawk thung a. Hei thu hian a sawi tum leh a kawh tum ber chu, Pathian lama mihring rilru put dan tur, *Pathian nena kan inkar bik liau liau a ni.*
Thil inang thuak an nih laiin hriat hran, thliarfel a ngai ém ém a. A hmasa zawk tur leh a hnuhnung zawk tur an awm a. A hmasa lo tur zawk hmasak tir tum chuan, buaina kan tawk fo țhin! Chuvangin ngun taka ngaihtuah a ngai ta réng a ni.
Pathianin mihring a siam hian mihring hmaah hian *kawng hnih* a chhawp sak a. *Chatuan NUNNA* kawng leh, *chatuan BORALNA* kawng te an ni.
*Nunna kawng zawh turin min duh laiin Boralna kawng kan zawh ta zawk a.*
_Ka kawng zawh lai mêk a dik lo tih inpawm a, "Kawng dik lo ka zawh chhan pawh Pathian thiam loh vang ni lovin, keima thuawih loh vang a ni",_ tih *inpawm a, inchhir a, pawiti a, lungngai a, thuhnuairawlh leh inngaitlawm taka Pathian hmaah mahni dik lohna inpawm* hi Bible-in *SIM* tih min kawhhmuh a tum chu a ni. Inchhir, pawiti leh lungngaia indawm kun ngawtah hemi *SIMNA* hi a tawp lo va, Pathian hnena *tlukluhna leh hawikirnain* a chhunzawm nghal thin. _(Fapa tlanbo dinhmun kha ngaihtuah ila!)._
Hei hi, *SIM No 2* khi a ni a, _Pathian thu chhiar leh Pathian thu hril ngaihthlak ațangin a lo awm thei a, mimal nunah pawh amahin a lo thleng ve thei bawk_, *Pathian hnena hawikir leh tlukluhna* lai tak hi *Thlarau Thianghlim hnathawh ropui ber pakhat* a ni.
*'SIM No.2-ah'* khian Pathian thu kan hriat, kan chhiar leh ngaihthlak te kaltlangin kan lut phawt a, *Thlarau Thianghlim puihnain* Pathian hnenah kan tlu lut a, Pathian kan lo *'RING'* ta a, _(a thu kan lo awih ta a..)_. Pathian thuawih a, a thu zâwmtuten Thlarau Thianghlim chenchilhna kan lo chang a, *'SIM No. 1'* zawkah khian hruai luhin kan lo awm ta a, thil kan lo chin dawklak țhin chi hrang hrang kan lo *kalsan, nghei, bansan*..etc. thei ta țhin a ni.
Simna kawng min kawhhmuh a, min kaihruaitu Thlarau Thianghlim leh Pathian thu (Bible) leh Pathian thu hriltu te hi awm sa reng tawh an ni a. Mahse, a *SIMTU TUR MIHRING* zawk hian kan inchhut ngawn san tlat thei a, ngawhngawl kan chhuah tlat thei!! Chutiang mi chu ni lo turin *keimahni lam kan pawimawh ém ém a ni!!*
Zoram mipui țhenkhatte hi chuan thil kan hre fuh zat lo deuh va, kan hriatfuh lohna lai tak hi sualin remchangah a lo hmang thiam ém ém bawk!!
*No. 1* zawk ațang khian bul țan kan tum a, Camping kan lut a, *Pathian zarah kan thil chin (dawklak) țhin, zu, drugs, etc. kan bansan/nghei/thlah ve ngei a*.....
He dinhmun kan thlen chiah hian, *piangthar* kan inti a, mipui pawhin *piangthar* hmuhin hmuh kan lo tum deuh țhup a, kan thlir țhup a, hun engemaw chen chu, *an/kan piangthar thei vâwk vâwk țhin* khawp mai!
Kan peih loh hun a lo thlen ve leh..... *"Ka da leh tawh / A da leh tawh, / piangthar da leh"*, kan ti țhin.
Kan thlir dan leh hriat dan hi a fuh chiah țhin lo fo a lo ni!.

_*We must unlearn what we have learned, because a conditioned mind cannot apprehend the infinite.....*_ this is metanoia!!