KRISTA INLARNA
Thupuan 1:9-20
Vawinah hian Krista inlarna, a ropui lai hmel chungchang kan zir leh dawn a ni.
Johanan inlarna a hmuh na hmun PATMOS hi Caria thlang lama thliarkar te tak te, mel killi 16 vel leka zau a ni a, tunah chuan PATINO an ti. He hmunah hian hun laihawl vel atang khan Tum thing a tha duh em em a, a hmingah pawh PALMOSA an tih phah hial a ni. Johanan inlarna a hmuh lai hian Patmos thliarkarah a awm a, Lal ber Domitian an thil laihchhuahnaa thawk tura a tantir a ni. Chuta tang chuan a hrehawm tawrh puite rawn thlamuanin kei, in unaupa, nangni ang bawka tih duhdah leh hrehawmna tinreng chhel taka in tawhpui leh nangni ang bawka Vankhualehtui nihna hial pawh nei ve hian tiin bul a rawn tan a ni.
Johana inlarna dawn hun lai vel hian Rome Lal te hian an mahni Pathian a be turin a mipuite an phut lui nasa em em a,Pathian a be duh lo te chu rethei tak leh hrehawm takin taninah an khung thin a, chutianga an tan tir zinga pakhat chu Johana hi a ni.
Keini vawina he thu zirtu zawng zawng te pawh hi harsatna reng reng tawk ve ngailo leh nuamsa taka awm der der chu kan awm kher awm lo ve. Vawiinah hian enge kan sal tanna Patmos chu ni ve ang le ? Kan hrehawm tawrh theuh leh min ti hrehawm tu chu a in ang lo hlawm ngei ang, mahse eng harsatna emaw ber chu kan tawk theuh si. Chungkuaah, khawtlangah, Kohhranah, tam tak hi chu Lalpan Fanau rochan duhawm tak min pek te hian min ti rum vawng vawng thin a nih hi. Johana hian a tanna hmun Patmos a hrehawmna tinreng a tawh te chu ain bawhbeih tir lova a hrehawmna chu Pathian hnaih leh zualna atana hmanga, Amah nena len dun na remchang atana a hmang ang hian keini pawhin kan harsatna tawh theuh te hi in bawhbehtir lovin, Johana anga Pathian min hnaih tir tur atan leh, Pathian nena inpawlna min neih tam tirtu atana kan hman a 'Hrehawmmahse i ta ka ni Lalpa' kan tih tlat theih hi ava han tul em!!
Johana chu Pathianni(Sunday) ah chuan Thlarauvin a lo awm a(Chu chu zelin a lo awma tih nen ang khat a ni) a kiang vel thil, lei thilte reng reng chu hre lovin Pathian thu leh Thlarau lam thutein a lo khat ta tlat mai a ni. Chutianga a awm lai tak chuan Pathianin a hnenah a tih tumte chu a rawn puang ta a ni. Hnung lam atang chuan aw ring takin a thil hmuh tur te chu ziak tur leh Kohhran pasarih te hnena thawn turin a rawn hrilh a.
Keini pawh Johana ang hian Pathian aw hre tur chuan kan kiang vel lei thil te reng reng hre chang lova Pathian thu leh Thlarau lam thu tea kan khah tlat a tul khawp mai. Hetia kan awm ang mai hi chuan Lalpa aw hi kan hre pha ta meuh lo niin alang! Lalpa aw hre tur chuan enge kan tih tur ni ta ang ? Johana anga kan Tanin hmun theuh atanga beidawng lova Pathian kan auh phawt chuan a awmpuina changin a Aw kan hre thei ngei ang.
Johana chu inlarna a hmuh te Lehkhabuah ziak tura hrilh a ni a, he thu hi chang 19 ah pawh sawi nawn a nih avangin a ngaipawimawh hle a ni ngei ang. A inlarna hmuh te pawh ama tana vawng mai lova, hrehawm tuar mek te fuih harh nana hmang tura tih a ni bawk a.
Kan mawl ang anga a Aw kan hriat chhun te, a pawlna kan dawn thin te, a thu leh hla hmanga min pawl thinna te hi ngawihbo puia mahni tana vawng mai tur kan ni dawn em ni ? Heng kan hlim leh lawmna te, a Aw kan hriat fo thin te hi In khata kan chenpui te, kan hnathawhpuite, Kohhrana kan rawngbawlpuite fuih harhna atana leh Lungngai mangang te thlamuantu atan sawi chhuak thin ila, mi ten Pathian ropuina an va hmu leh zual dawn em.
Bung 1:12 ah hian rangkachak khawnvar dahna pasarih chungchang kan hmu a, chang 20 ah khawnvar dahna pasarih te chu Kohhran pasarih te an nih thu a rawn sawifiah leh a, khawnvar dahna chu khawnvar chhita hunna atana siam a nih angin kohhran chu Krista chenna, Krista eng ti lang tu a ni.
Khawnvar dahna chu khawnvar chhita hunna atan liau liaua siam a nih angin keini Kristaa Kohhrante pawh hi kan Lapa chenna tur atan liau liaua siam kan ni. Amah neitu te chu a Temple thianghlim kan ni si a. Khawnvar hunnaah khawnvar an dah thin angin kan hnenah Lalpa pawh a cheng ngei tur a ni ang. A chenna dal thei tu thil dang zawng zawngte hnawlin " Ka thinlung sual bawlhhlawh hnu hi i Templeah chantir la, a chhungah hian aw ka Lalpa chatuanin lo cheng ang che" tia Kan Lalpa Pathian hi kan sawm ngawih ngawih a tul khawp mai.
Bung 1:13 ah chuan mi tu emaw mihring fa ang Johanan a hmuh thu a sawi a, a hmuhna hmun pawh Khawnvar dahna zingah a ni. Khawnvar dahna chu Kohhran ho entirna a ni. Kan Lal Isua chu Kohhran ho zingah hmuh turin a awma, keini hi khawilai hmunah nge kan awm ve thin ? Kan awmlohna tur hmun takah te hian kan lo awm thin lo maw? Ngaihtuah a va ti thui em ti rawh u. Lal Isuan Kohhran ho te a uap reng thin ang hian Lal Isua hian min uapin, kan mangan lungngaihah te min thlamuan thin a nih hi.
Johan'n kan Lalpa thuam inbel a hmuh dan chu Puithiam thuam inbelin a ni. Lal Isua chu Lal ber leh Puithiam lal ber a nihna lantir turin, Lal kawrfual, Puithiam kawrfual ke ler thlenga fual hain a inlan a ni.
Lal Isua hi a lan dan atang ringawt pawhin Puithiam a ni tih hai rual a ni lo ang hian Lal Isua Krista neitu/Piangthar kan nihna te, ama zara puithiam kan nihna te hi min hmutu apiang te hian an hre nghal mai thei a ngem le? Hei hi ngaihtuah ngai tak ani ! Khawvel mite nen nghawngkawl pakhat bat duna, an ni nena kan danglam lo a nih chuan kan ringtu nihna te pawh hi kan in ennawn fo a tul ngei ang.
Kan hla phuahtu ten "A ropuinaa inthuamin a hmelmawi ka hmuh hunin" an lo tih angin a ropuina famkim nen Johna hian a hmu a, a lu leh sam beram hmul leh vur ang maia var chuan mi fing, mi zahawm, mi rintlak a nih zia a entira, a mit meialh ang chuan engkim hmutu leh hretu, engkim chunga roreltu a nih zia a entir a,a kephah dar tle mi chuan a rorelna nghehzia a tarlanga, a aw tui tam tak ri ang hian a thawm natzia leh ropuizia a entir. Heng a inthuamna leh a hmel lan dan te hian kan Lalpa chu mi namailo tak a ni tih a tarlang chiang hle awm e. Nang leh kei hi kan inthuam dan atang te kan lan dan atang te hian mi ten tunge a nih min tih ve ang le? Puithiam hmuhin min hmu ve hlawm a ngem le ?
Bung 1:16 kan chhiar chuan Johana mi hmuh hian a kut dinglamin Arsi pasarih a ken thu kan hmu. Chang 20 ah Arsi pasarih te chu Kohhran pasarih te tirhkoh an nih thu kan hmu a, a ka atanga Khandaih hriam tawn a chhuah thu leh a hmel chu nisat vanglai tak ang a nih thu kan hmu.
He lai chang kan chhiar hian kan Lalpan a mite a ensan loh zia chiangtakin kan hre thei awm e. Johana mi hmuhin a kut dinglama Arsi pasarih a keng ang hian Lal Isua chuan Kohhrante/a mite hi a thlahthlam ngai lova a veng reng thin. "Nangmah i muhil ngai love, keimahni min veng thin" tih ang khan khandaih hriam tawn(a thu) hmangin a mite min hum tlata, a hmel ringawt pawh hi hmelma te tan en ngam chi rual a ni lo. Chhun nisat vanglai takin Ni khi han en teh, en har tak a ni. Chutiang chiah chuan Lalpa hmel hi en a har a ni chu.
Hetiang khawpa hmel ropui hi Johana meuh pawhin en ngam lovin Thlamuan ngai khawpa hlau hlawpin a ke bulah a tlu ta thlawp mai a nih kha.
Tunlai huna mi tam tak inlarna hmuh hi chu kohhranhote chhiar tura ziaka han dah tlak em ni lo te, Krista Lalna aia khawvel chhiatna tur thu leh kohhran beihna hmanrua niawm tak tak te a ni nawk hlawm mai. Chutih lai chuan Johana inlarna hmuh thung hi chu Kohhrante min phuarkhawmtu leh min thlamuantu, Kohhrana tana rinawm taka kan awm zel theih na tur thuchah keng a ni tlat thung si a ni.
Sawiho tur :-
1. "Thlarauva awm"tih hi engtia hriatfiah tur nge ni ang ?
2. Johan an inlarna a dawn ni(Pathianni) hian pawimawhna a neiin
kan hria em ?
